«Միացյալ երիտասարդական լիգա» երիտասարդական շարժումը Բաց նամակ է հղել ՀՀ նախագահ Սերժ Սարգսյանին, ուր արտահայտում է իր անհանգստությունը «Խորան» կրոնական կազմակերպության և կառույցի ղեկավար Հրաչյա Խաչատրյանի անօրինական գործունեության մասին և նախագահից խնդրում դադարեցնել «Խորանի» գործունեությունը:
Բաց նամակում երիտասարդական շարժման ներկայացուցիչները տեղեկացնում են, որ «Խորան» կազմակերպության մասին բողոքների հրապարակումից հետո, վերջինիս անդամները զանգահարել են «Միացյալ երիտասարդական լիգա»-ի ակտիվիստներին՝ սպառնացել ու վիրավորել իրենց:
«Վիրավորում էին նաև մեր երկրին, «Հայաստանը պիղծ երկիր է» խոսքերով, նման բովանդակությամբ բազմաթիվ վիրավորանքներ ենք ստացել սփյուռքից, մասնավորապես`Իսպանիայի մեր հայրենակիցներից»,- ասված է շարժման բաց նամակում:
«Մեծարգո պարոն նախագահ, խնդրում ենք անհապաղ քայլեր ձեռնարկել այդ կրոնական կազմակերպության գործունեության դադարեցման ուղղությամբ»,- ասված է ՀՀ նախագահին հասցեագրված Բաց նամակում:
Աղբյուր՝ tert.am, 08.05.12
